Сэрии кэнниттэн олоҕу чөлүгэр түһэрии, колхозтары бөдөҥсүтүү

1950 сыл сэтинньи 17 күнүгэр хомунньуустар Нэһилиэк Өтөҕөр мунньахтаан кыра колхозтары холбоон бөдөҥсүтэр туһунан уураах ылыммыттар: (Мунньах бэрэссэдээтэлэ Бурнашев Иван Семенович, секретара Находкина Евдокия Евтрофеевна)
• Колхоз аатын академик Лысенко аатынан ааттыырга;
• Колхоз бөһүөлэгин Кэптэнини аныырга;
• Колхоз председателинэн Алексеев Георгий Гаврильевиһы, солбуйааччы председателинэн Олесов Егор Петровиһы, ҮТФ заведующайынан Бурнашев Иван Семеновиһы, СТФ заведующайынан Бурнашев Василий Иннокентьевиһы, племферма заведующайынан Новгородов Илья Константиновиһы, кымыс ферматын заведующайынан Дьяконов Гаврил Семеновиһы, колхоз бухгалтерынан Охлопков Николай Константиновиһы, завхоһунан Кычкин Николай Николаевиһы таларга.
1951 сылтан учаастактартан дьон дьиэлэрин көһөрөн аҕалан, тутан, ыал элбээбитэ. Ол иннинэ бөһүөлэккэ уонча эрэ дьиэ баара. Уулуссалары көнө гынан, бөһүөлэк чертеһа оҥоһуллубута. Кэптэниттэн Хомустаахха диэри сүгэнэн, баһымньынан маһы солоон, колхозтаахтар тутуу биригээдэтэ (Олесов Василий Григорьевич), тутуу үлэһитэ Борисов Николай Федорович тоҥуу хаарынан тоһоҕону туруоран,солообуттара.Бу суолунан аан — маҥнайгы ГАЗ-51 массыынаны бастакы суоппар Данилов Иннокентий Николаевич 1951 сыллаахха Кэптэнигэ аҕалбыта.
Маны таһынан улахан суолталаах сиэмэни үүннэрии тыын боппуруоһа, ынахтан үүтү ыаһын, сылгыны иитии, оту — маһы таһарга, оту субууттан кэбиһии (мас волокушалары оҥотторуу, туттуу), механизацияны көҕүлээһин, үрдүк үүнүү звенолара, оҕуруот аһын үүннэрии, ыччат — комсомольскай ферма (Копырина Анастасия Семеновна) салайааччы буолбута. Үлэҕэ саҥа көҕүлээһиннэр, дьон — ыччат күргүөм үлэтэ ситиһиилэри аҕалбыта.
Георгий Гаврильевич үлэлиир сылларыгар (1951-1954) сылгыһыттар Даалыттан Нафанаилов Константин Петрович 1952 сыллаахха 26 биэттэн 25 кулуну ылан, Хомустаахтан Попов Николай Иннокентьевич 1952 сыллаахха 28 биэттэн 28 кулуну ылан, Москваҕа БСТХБ кыттыыны ылбыттара. Попов Н.И. Бүтүн Союзтааҕы быыстапка Кыра кыһыл көмүс мэтээлин ылбыта. Оройуоннааҕы быыстапкаҕа Кэптэни биригээдэтин ыанньыксыта Новгородова Матрена Михайловна 1954 сыллаахха 11 ынаҕыттан 11 ыйга 921,5л. үүтү ыан, былаанын 106,7% толорон, 11 ньирэйи тыыннаахтыы иитэн, кыттыбыттара. Итинник ситиһиилэри Шапова Елена Ивановна, Копырина Анастасия Семеновна ситиһэн, оройуон Бочуотун дуоскатыгар тахсыбыттара.