Муус устар 2 күнэ - Дания улуу суруйааччыта Ганс (Ханс) Христиан Андерсен ( 1805 с.) төрөөбүт күнэ. Кини аатын аан дойдуга билбэт киһи диэн суоҕа чахчы. Андерсен «Гадкий утенок», «Дюймовочка», «Стойкий оловянный солдатик», «Оле-Лукойе», «Принцесса на горошине», «Снежная королева», о.д.а. остуоруйаларыгар бары да бигэнэн улааттахпыт, умсугуйан аахтахпыт. Аан дойдуга оҕо кинигэтин күнүн улуу остуоруйаһыт төрөөбүт күнүгэр сөп түбэһиннэрэн, Оҕо кинигэтин аан дойдутааҕы Сэбиэтэ 1967 сыллаахха биллэрбит. Онтон ылата бибилэтиэкэлэр, кинигэ бэчээттээн таһаарар кыһалар, оҕо тэрилтэлэрэ тэрээһин бэртээхэйин тэрийэр үтүө үгэстэммиттэр. Ол курдук, бүгүн биһиэхэ "Чэчир" оҕо уһуйаанын улахан уонна бэлэмнэнии бөлөҕүн оҕолоро ыалдьыттаатылар.Оҕолор бу күн историятын иһиттилэр, кинигэ ханна, хайдах оҥоһулларын туһунан презентация көрдүлэр уонна бэйэлэрэ дьэрэкээн ойуулардаах дьиэ кыылларын туһунан кинигэ оҥордулар. Сааскы сибиэһэй салгыҥҥа хааман, библиотека дьиэтин көрөн-истэн, өссө кинигэ тутуурдаах үөрэн-көтөн уһуйааннарыгар төнүннүлэр.