Ыам ыйын 18 күнүгэр уһулуччулаах уопсастыбаннай диэйэтэл, учуонай, суруйааччы, кыраайы үөрэтээччи, Саха сирин суруналыыһа Василий Васильевич Никифоров-Күлүмнүүр төрөөбүтэ 160 сылын бэлиэтиибит. Василий Васильевич Никифоров 1866 с. ыам ыйын 18 күнүгэр Дүпсүн улууһугар (билиҥҥи Уус-Алдан улууһугар) Нэрэлики алааска, улуус суруксутун кэргэнигэр төрөөбүтэ. 🔸Үстээҕэр тулаайах хаалбыт Баһылай уолу каракозовец Н.П.Странден таба көрөн ааҕарга-суруйарга үөрэтэр 🔸П.П.Подбельскай кистэлэҥ куруһуогар сылдьан общественнай-политическай , научнай-философскай билиилэнэр. 🔸Прогимназияны ситэ бүтэрэ илигинэ кинини улууһугар суруксут оҥостоллор, эдэр киһи кыахтааҕын билэн кулубаҕа быыбардыыллар. Аҕыйах сыл бу дуоһунаска үлэлииригэр үөрэҕириини биллэрдик хамсатар.Бэйэтин средствотынан уонна атыыһыт К.Д.Спиридонов көмөтүнэн дьадаҥы улууска, Дүөндүгэ пансионаттаах оскуола дьиэтин туттарар, министерскэй оскуоланы астарар. 🔸"Сахалар кэргэннии олохторо" диэн үлэни суруйбута, 1896с. Нижнэй Новгородка Бүтүн Россиятааҕы промышленнай быыстапкаҕа аатырбыт-айанньыт ученай П.П. Семенов - Тяньшанскай салалтатынан Саха салаатын кыһанан-мүһэнэн тэрийэн Саха сирэ диэн баарын, онно хайдах дьон олороллорун , кинилэр материальнай, духовнай культураларын аан бастаан киэҥ эйгэҕэ таһааааран улахан интэриэһи тарпыта. 🔸 Олохтоох интеллигенцияны, улуус, куорат сабыдыаллаах дьоннорун түмэн "Сахалар союзтарын" хамсааһынын кини баһылаан-көһүлээн тэрийбитэ.(1906с., тохсунньу). 🔸 1914с. Бүтүн Россиятааҕы норуот үөрэҕириитин бастакы сьеһигэр Никифоров дакылааттаан туруорсуутун түмүгэр Дьокуускайга Учуутал семинарията аһыллыбыта. Кини кыһатыгар иитиллибиттэрэ М.Аммосов, П.Ойуунускай, И.Барахов, С.Аржаков о.д.а Норуокка үөрэх, билии тарҕаныытыгар Василий Васильевич элбэх өҥөлөөх. 🔸 А.Кулаковскайы, А.Софроновы, Н.Неустроевы кытта бииргэ саха суругунан уус-уран литературатын төрүттэспитэ. "Союһу" тэрийбитин иһин хаайылла сытан патриархальнай уонна колониальнай батталы утары охсуһар Манчаары Баһылай туһунан айымньыны суруйбута. 1906 с. "Манчаары" драмата суруйан, ити сыл аан бастаан бэйэтин дьиэтигэр "Саха кулуубун" дьонун көмөтүнэн оонньотон көрдөрбүтэ. ("Саха сирэ" хаһыат, 1996с.№73 тахсыбыт "Саха интеллигенциятын революция иннинээҕи баһылыга" ыстатыйаттан быһа тардан ылылынна)