Улуу Кыайыы 81 сылын көрсө ыам ыйын 8 күнүгэр Кыайыы болуоссатыгар “Өйдүүбүт! Сүгүрүйэбит! Махтанабыт!” өйдөбүнньүк чүмэчи аахсыйата ыытылынна. Бу күн биир дойдулаахпыт, хоһоонньут, тылбаасчыт И.И.Артамонов “Кыайыы салюта” хоһоонун күргүөмүнэн ааҕыы аахсыйатыгар Даалы олохтоохторо, “Кэрэли”, “Аал уот” түмсүүлэр кыттыстылар. Кыайыы салюта Ыам ыйын 9 күнүгэр “Ким да умнуллубат, туох да умнуллубат” торжественнай миитин ыытылынна. Тэрээһин “Улуу Кыайыыны уһансыбыттара” радиорепортажтан, Лөгөй нэһилиэгин олохтоохторун, үлэһит кэллэктииптэрин параадыттан саҕаланна.Олохтоохтор «Өлбөт үйэлээх полк” сэриигэ кыттыбыт бэйэлэрин чугас дьоннорун хаартыскаларын тутан парадка кытыннылар. Миитин кэмигэр «Өбүгэ аһа» түмсүү «саллаат хааһытынан» күндүлээтилэр. Бу күн ахтан-санаан ыллыбыт аҕа көлүөнэ дьоммутун, Ийэ дойдуларын көмүскээн Хорсуннук сэриилэспит буойуттары. Тыылга турууласпыт үлэһит норуоту, оонньоботох оҕо саастаах эбээлэрбитин, эһээлэрбитин. Хатыламматын хаһан да Хара дьайдаах сэрии, баар буоллун өрүү ыраас халлаан, чаҕыл күн. Эйэ, дьол, үөрүү! Тэрээһин кэнниттэн СӨ спортка уонна физическай култуураҕа спордун үтүөлээх үлэһитэ, педагогическай үлэ уонна Арассыыйа спордун бэтэрээнэ, Лөгөй нэһилиэгин, Уус-Алдан улууһун бочуоттаах олохтооҕо Г.К. Дячковскай аатынан түөлбэлэр икки ардыларыгар эстафета үрдүк таһымҥа ыытылынна. Эстафета түмүгүнэн I-кы миэстэни “Сардаҥа”, II-с миэстэни “Сарыал”, III-с миэстэни “Саһарҕа” түөлбэлэрэ ыллылар. Кыайыылаахтар мэдээллэринэн наҕараадаланнылар.