Кулун тутар 30-31 күннэригэр С.С. Васильев – Борогонскай аатынан киин бибилэтиэкэ ааҕар саалатыгар Уус Алдан оройуона төрүттэммитэ 100 сылын көрсө «Үүнэр-сайдар мин дойдум!» улуус нэһилиэктэрин икки ардыларыгар ыытыллар култуура бэстибээлин чэрчитинэн «Мин нэһилиэгим олоҕо – улууһум историятыгар!» диэн икки күннээх научнай-практическай кэмпириэнсийэ ыытылынна. Манна улуустааҕы кииннэммит бибилэтиэкэ тиһигин 26 филиалыттан бибилэтиэкэрдэр кыттан, нэһилиэктэрин 1930-1954 сыллардааҕы кэрчик кэмин хабан, нэһилиэктэрин төрүттэниитин, маҥнайгы сопхуостар тэриллиилэрин, үөрэхтээһин сайдыытын, күөн туттар төһүү-күүс дьоннорун, Аҕа дойду сэриитигэр кыттыыларын, партийнай, комсомольскай, пионерскай хамсааһыннары уо.д.а. кэпсээтилэр. Кэмпириэнсийэ экспердэринэн Уус Алдан улууһа тэриллибитэ 100 сылын көрсө ыытыллар тэрээһиннэри тэрийэр хамыыһыйа эппиэттээх сэкирэтээрэ Иван Колодезников, улуустааҕы кииннэммит бибилэтиэкэ тиһигин дириэктэрэ Лена Павлова, Сэһэн Ардьакыап аатынан улуус түмэлин экскурсовода Александр Сивцев үлэлээтилэр. Кэмпириэнсийэ матырыйаала Уус Алдан тэриллибитэ 100 сылыгар бэчээттэнэр кинигэ сериятыгар туһаныллыаҕа.