Олоҥхо курдук чулуу айымньыны толорор сүдү талааннаах олоҥхоһуттарбытын, дууһа нарын кылын таарыйар хомус этигэн ырыатын толорор биир дойдулаахтарбытын ытыктыы, сүгүрүйэ, киэн тутта ааттыыбыт, бар дьоҥҥо кэпсиибит! Бэһэҕээ, сэтинньи 19 күнүгэр П.П.Оготоев аатынан сынньалаҥ кииҥҥэ олоҥхо, хомус декадатын үөрүүлээх аһыллыыта буолла."Далбар", "Арчы" үҥкүү бөлөхтөрө ыраастаныы,арчыланыы сиэринэн астылар.Лөгөй нэһилиэгин баһылыгын солбуйааччыта Бурнашева А.А. эҕэрдэ тыл эттэ, "Лөгөй сыдьааннара" фольклорнай бөлөх ыллаан-туойан, Лөгөй лицей-интернат муусукаҕа учуутала Ангела Харитонова хомуска оонньоон бу тэрээһини киэргэттилэр. Олесов П.С- Күөх Бүөтүккэ, Бурнашев Н.П. - Боодоҕос, Н.Петухов - Дьаралыктаах Наһаар, П.В.Оготоев о.д.а нэһилиэкпит олоҥхоһуттарын, виртуоз-хомусчут П.П.Оготоев туһунан "Үйэлэргэ ааттарын ааттыыбыт" ахтыы киэһэтэ буолла. Мустубут дьон олус интэриэһиргээн көрдүлэр-иһиттилэр. "Олоҥхо - олохпут ситимэ" быыстапка сэтинньи 29 күнүгэр диэри турар. Кэлэн көрүҥ, сэргээҥ!Олоҥхоһуттарбыт тустарынан араас матырыйааллары, хаартыскалары көрөн, элбэҕи билиэххит. Декада устата ыытыллар тэрээһиннэргэ актыыбынай кыттыыны ыларгытыгар ыҥырабыт.