Төрөөбүт сахатын тылын сайыннарыыга-чинчийиигэ олоҕун анаабыт, саха алфавитын төрүттээбит, бастакы лингвист Семен Андреевич Новгородов төрөөбүт күнүгэр тубэhиннэрэн, олунньу 13 күнэ төрөөбүт тыл уонна сурук-бичик күнүнэн бэлиэтэнэр. Бу дьаhал Саха Республикатын бастакы Президенэ Михаил Ефимович Николаев ыйааҕынан 1996 сыллаахха олохтоммута. Бу кэмтэн ыла Республикабытыгар араас таһымнаах тэрээһиннэр ыытыллаллар. Тыл күнүн декадатыгар Кэптэнитээҕи модельнай сельскай библиотекаҕа сахабыт тылын сайыннарар, билиини хаҥатар «Саха тыла - өркөн өйбүт» биктэриинэ - оонньуу ыытылынна. Өс хоһооннору, таабырыннары таайыы, сомоҕо-домохтор суолталарын быһаарыы түмүгүнэн I миэстэни ылла Шарина Е.Д., II миэстэни Аржакова Е.Н., III миэстэни Колесова А.Р. ыллылар. «Олунньу 13 күнэ - төрөөбүт тыл күнэ» диэн «Чэчир» уһуйаан улахан уонна бэлэмнэнии бөлөх оҕолоругар аралдьыйыы буолан ааста. Бу тэрээһиҥҥэ кинигэ быыстапката турда, оҕолорго, иитээччилэргэ тургутук-оонньуулар ыытылыннылар, кырачааннарбыт хоһоон аахтылар уонна оһуохайынан түмүктээтибит. Ону тэҥэ Россия суруналыыстарын союһун чилиэнэ, «Саха Республикатын киинэтин ветерана, суруналыыстар республикатааҕы бириэмийэлэрин «Кыһыл көмүс бөрүө» уонна «Илин эҥэр» экономическай зона олохтообут В.В.Никифоров - Күлүмнүүр аатынан бириэмийэ лауреаттара, хомоҕой тыллаах хоһоонньут И.И. Попов - Уйбаан Бахсылыырап кэриэһигэр «Иллээх дьиэҕитигэр...» хоһоонун күргүөмүнэн ааҕыы буолла. Манна Лөгөй лицей-интернатын, «Лөгөй нэһилиэгэ» МТ дьаһалтатын үлэһиттэрэ, «Аал уот» ветераннар түмсүүлэрэ кыттыста. Уонна Национальнай библиотека ыытар өрөспүүбүлүкэтээҕи «Таптыыр сахам тылынан» дьыктааҥҥа 3,6 кылаас үөрэнээччилэрэ уонна улахан дьоҥҥо X-c төгүлүн ыытыллар «Сахалыы дьыктаан-2024» уопсайа 8 киһи кэлэн суруйда. «Бастыҥтан бастыҥ суруксут» Ущницкая В.Г., «Бастыҥ суруксут» Матвеева М.Д., «Үчүгэй суруксут» Андросова М.Н. ааттары ыллылар. Көхтөөхтүк кыттыбыт бар дьоммор махталбын биллэрэбин! Төрөөбүт тыл, сурук-бичик күнэ үтүө үгэскэ кубулуйан, сыллата бэлиэтэнэн, тэнийэн, сайдан истин!